IMAXE COVID

Imaxe Covid xurde como colectivo para crear un testemuño visual da crise sanitaria derivada da pandemia da COVID-19. Seis fotoxornalistas galegos que agrupan as súas imaxes para crear memoria visual do estado de alarma, que obrigou a confinar á poboación, mudando radicalmente a sociedade. O resultado e a suma de distintos puntos de vista, cos matices e arestas propias de cada autor, que axuda a dar un discurso máis amplo e máis real da incidencia do coronavirus en Galicia. O colectivo formado por Óscar Corral, Monica Ferreiros, Agostiño Iglesias, Brais Lorenzo, Miguel Muñiz e Miguel Riopa recolle algunhas das máis impactantes e reflexivas imaxes tomadas por cada un dos autores en distintos lugares e fases da pandemia, e nace como ferramenta para amosar e poñer en valor o traballo dos fotoxornalistas, declarados traballadores esenciais nesta pandemia.

Óscar Corral (Santiago de Compostela, 1981) comezou a traballar como fotoxornalista no ano 2003. Dende 2009 traballa no diario El País en Galicia, labor que compaxina con reportaxes internacionais para o mesmo diario así como para El País Semanal. En 2013 foi seleccionado nos «Full-Focus» da axencia Reuters.

oscarcorral.gal

Mónica Ferreirós (Vilanova de Arousa, 1975) estudou Fotografía Artística na Escola Mestre Mateo e dende 1998 traballa de fotoxornalista en medios de comunicación galegos e estatáis. Actualmente é freelance e membro de @imaxecovid.

Agostiño Iglesias (Lousame, 1984) estudou Fotografía Artística na Escola Antonio Failde de Ourense. Actualmente traballa de fotoxornalista freelance, colaborando principalmente con La Voz de Galicia e en publicacións para revistas de tirada autonómica e nacional.

agos.gal

Brais Lorenzo Couto (Ourense, 1986) estudou fotografía Artística na Escola Antonio Failde de Ourense e Xeografía e Historia na Universidade de Vigo. Dende 2010 traballa de fotoxornalista, habitualmente en Axencia EFE e Faro de Vigo.

Miguel Muñiz (Santiago de Compostela, 1966) estudou Fotografía Artística na Escola Mestre Mateo. Traballa como fotoxornalista no diario ABC dende fai mais de 20 anos. Colaborador habitual de diversos medios como Expansión e Revista ECO. É autor ademais de diversas publicacións.

Miguel Riopa (Campo Lameiro, 1967) traballa como fotoxornalista desde o ano 1989. Na actualidade desenrola o seu labor na axencia de noticias Agence France-Presse. No ano 2008 foi recoñecido con un dos premios World Press Photo.

miguelriopa.com/